«Ա.Ջամալեան» Պատանեկան Միութեան եռօրեայ բանակում
Յուլիս 7 2017էն Յուլիս 9 2017 երկարող 3 օրերու ընթացքին Թրիփոլիի «Արշակ Ջամալեան» Պատանեկան Միութեան պատանիները մասնակցեցան եռօրեայ բանակումի մը Քաֆթուն շրջանէն ներս:
Բանակումը առիթ հանդիսացաւ պատանիներուն որպէսզի ձեռք բերեն նոր գիտելիքներ, մօտէն ծանօթանան բանակումի կեանքին եւ օրէնքներուն:
3 օրուան ընթացքին պատանիները աշխոյժ ձեւով հետեւեցան իրենց համար պատրաստուած օրակարգին:
Անոնց ներկայացուեցան դասախօսութիւններ հայապահպանման եւ բանակումի կանոններու մասին: Ցուցադրուեցաւ նաեւ Լիզպոնի 5 տղոց նուիրուած տեսերիզ մը:
Խաղերու, մարզանքներու, արշաւներու եւ երեկոյեան խարոյկի ճամբով, պատանիներու խանդավառութիւնը հասաւ իր գագաթնակէտին:
Բանակումի աւարտին, պատանիները հեռացան բանակավայրէն իրենց հետ տանելով լաւ յիշատակներ եւ անգամ մը եւս ամրապնդեցին իրենց մէջ հայապահպանման ոգին:
