ՊՄ Ներկայացնող Պատուիրակութիւն Մը Կ՛այցելէ Պիքֆայա

Կիրակի, 23 ապրիլ 2017-ին, երեկոյեան ժամը 6:00-ին, ՀՅԴ Լիբանանի պատանեկան միութիւնները ներկայացնող վարչութիւններէ բաղկացած խումբ մը պատանիներ մեկնեցան Պիքֆայայի վանք` իրենց յարգանքի տուրքը մատուցելու ապրիլեան նահատակներուն յիշատակը յաւերժացնող յուշարձանին դիմաց:

Պատանիները նախ մէկ վայրկեան յոտնկայս լռութեամբ յարգեցին Հայոց ցեղասպանութեան զոհերուն յիշատակը, ապա «Մշակ բանուոր» քայլերգով սկիզբ առաւ ձեռնարկը: ՀՅԴ Լիբանանի պատանեկան միութիւններու Ընդհանուր վարիչ մարմինին անունով խօսք առաւ Արամ Սոմունճեան, որ դիմելով պատանիներուն ըսաւ. «Եկած էք այսօր հոս` իբրեւ Հայ յեղափոխական դաշնակցութեան կրտսերագոյն սերունդի ներկայացուցիչներ, յարգանքի ձեր տուրքը մատուցելու Հայոց ցեղասպանութեան մէկուկէս միլիոն նահատակներուն եւ գոյատեւող նախահայրերու յիշատակին: Ձեզմէ ո՞վ չէ լսած իր մեծ հօր պոռթկումը: Ո՞վ չէ տեսած իր մեծ մօր արցունքոտ ժպիտը, ո՞վ չէ զգացած իր ներքին ցաւը, որ միայն ցաւ ըլլալէ անդին բռունցք  մըն է պայքարի եւ ժայթքող բոց մը` աւելի քան դար մը կուտակուած վրէժի: Այս էր նշանաբանը Խանասորի մեր ֆետայիներուն: Այս եղաւ նշանաբանը բոլոր անոնց, որոնք մահը անտեսելով խիզախօրէն պայքարեցան հայ ժողովուրդի ազատագրութեան ի խնդիր»:

Շարունակելով իր խօսքը` Արամ Սոմունճեան ըսաւ. «Այսօր տակաւին չէ աւարտած պատերազմը: Տակաւին թշնամին փորձեր կը կատարէ նուաճելու մեր հողերը` փորձութեան տակ դնելով այս անգամ Արցախը: Պայքարի դաշտը լայն է. օտարամոլութիւն, ձուլում, անտարբերութիւն եւ ծուլութիւն: Կա՞յ աւելի վտանգաւոր հարց: Հետեւաբար, այսօր, եւ ամէն օր, եղէ՛ք արթուն ձեր շրջապատին մէջ: Աշխատեցէ՛ք ամէն գնով պահպանելու մեր հայկական արժէքները: Եղէ՛ք ուժեղ եւ համարձակ, թէ՛ ֆիզիքապէս եւ թէ՛ ալ մտովին: Երբեք մի՛ յուսահատիք եւ մի՛շտ մտածեցէք, որ այսօրուան ձեր աշխատածը վաղուան ճամբան պիտի հարթէ»։

ՀՅԴ Լիբանանի պատանեկան միութիւններու Ընդհանուր վարիչ մարմինի խօսքէն ետք Լիբանանի պատանեկան միութիւններուն անունով պատանիները ծաղկեպսակ զետեղեցին յուշարձանին առջեւ: Ձեռնարկը փակուեցաւ «Մենք անկեղծ զինուոր ենք» երգով:

 

«Վազրիկ» Յունիս 2016

ARF BADANI բջիջային ծրագիր

appposter