Հ.Յ.Դ. Լ.Պ.Մ. կ՚այցելեն Արամ Ա. Կաթողիկոսին

Կիրակի, 17 Ապրիլ 2016-ին, Հ.Յ.Դ. Լիբանանի Պատանեկան Միութիւններէն 190 պատանիներ այցելեցին Անթիլիասի Մայրավանք։ Իրենց հաղորդութիւնը ստանալէն ետք, անոնք Անթիլիասի վեհարանի դահլիճին մէջ այցելեցին Ն.Ս.Օ.Տ.Տ. Արամ Ա. կաթողիկոսին։

Հ.Յ.Դ. «Նաւասարդեան» Պատանեկան Միութենէն Կարին Մինասեան ներկայացուց Եղիշէ Չարենցի «Ես Իմ Անուշ Հայաստանի» կտորը, որմէ ետք Հ.Յ.Դ. «Գէորգ Չաւուշ» Պատանեկան Միութենէն Նաթալի Մարգարեան ասմունքեց Դանիէլ Վարուժանի «Դերենիկը»։

Ապա, Ն.Ս.Օ.Տ.Տ Արամ Ա. կաթողիկոս իր խօսքը ուղղելով պատանիներուն, ողջունեց անոնց կատարած այս այցելութիւնը եւ անդրադառնալով հայ եկեղեցւոյ պատմական ու ներկայ դերակատարութեան, վեր առաւ հայ պատանիին դաստիարակութեան անհրաժեշտութիւնը եւ ազգային արժէքներուն փարելու անոր սուրբ կոչումը։ Վեհափառը իր խօսքին մէջ շեշտեց Հայոց Պատմութեան ուսումնասիրութեան կարեւորութիւնը, որ պիտի հանգի մեր անցեալին ու ներկային միջեւ զօրաւոր կամրջման։ Անդրադառնալով Արցախի վերջին իրադարձութիւններուն, ան ընդգծեց որ սփիւռքը ամբողջովին իր զօրակցութիւնը յայտնեց Արցախի զինուորներուն ու ժողովուրդին, որուն կենդանի օրինակն ալ նորագոյն սերունդն է։ Ապա, պատանիները միասնաբար երգեցին փունչ մը յեղափոխական երգեր ու «Հայեր Միացէք» երգով իրենց զօրակցութիւնը յայտնեցին Արցախի ժողովուրդին։

Կէսօրին, պատանիները ժամանեցին Ժիպէյլի ակումբ, ու Հայոց Ցեղասպանութեան 101 ամեակի ծիրին մէջ, լսեցին Հայոց Ցեղասպանութեան որբերուն նուիրուած «Արամ Պեզիկեան» թանգարանի հիմնադրութեան, կազմաւորման ու բաժանմունքներուն մասին զեկոյց մը, որ ներկայացուց թանգարանի տնօրէն՝ Պսակ Աբղ. Թէփիրճեանը։ Ապա, անոնք հերթաբար այցելեցին «Թռչնոց բոյն»-ի «Արամ Պեզիկեան» թանգարանը, աւելի մօտէն ծանօթացան անոր տարբեր բաժիններուն ու հաղորդակից դարձան իրենց նահատակուած ու գոյատեւած նախահայրերու տքնաջան կեանքին ու գործին:

«Վազրիկ» Յունիս 2016

ARF BADANI բջիջային ծրագիր

appposter